දරු ප්‍රසූතිය පහසු කරවන උපකරණයක් තැනෙයි
දරු ප්‍රසූතියකට සූදානම් වන ඕනෑම කාන්තාවක් තුළ යම් තැතිගැනීමක් හට ගැනීම අරුමයක් නොවේ. විශේෂයෙන් ස්වාභාවික දරු උපතක් බලා‍පොරොත්තුව සිටිනා ගැබිනි මව්වරුන් තුළ එකී තැතිගැන්ම වැඩි වශයෙන් දැකිය හැක. බොහෝ ගැබිනි කාන්තාවන් සිසේරියන් සැත්කම් මගින් දරු ප්‍රසූතියට සූදානම් වීමටත් මෙකී තැතිගැන්ම හේතු වෙන බව වෛද්‍යවරුන්ගේ මතයයි.
දශක ගණනාවක සිට ලෝ පුරා වෛද්‍යවරුන් දරු ප්‍රසූතිය පහසු අත්දැකීමක් කිරීම සඳහා විවිධාකාර පර්යේෂණ සිදු කරන මුත් ඒ කිසිම පර්යේෂණයකින්වත් බලා‍පොරොත්තු වූ සාර්ථක බව දැකගත නොහැකි විය.
එහෙත් ආජන්ටිනා ජාතිකයෙකු දරු ප්‍රසූතිය පහසුකරනා අපූරු උපකරණයක් නිර්මාණය කරන්නට සමත් වී තිබෙන බවත් එකී උපකරණය ලෝක සෞඛ්‍ය සංවිධානය මගින් අනුමත කර ඇති බවත් පසුගියදා ලෝ පුරා ජනමාධ්‍ය වාර්තා කළේය. මෙහි විශේෂත්වය වනුයේ එකී ආජන්ටිනා ජාතිකයා වෛද්‍යවරයෙකු හෝ සෞඛ්‍ය ක්ෂේත්‍රයේ සේවකයෙකු නොවීමයි. සැබවින්ම ඔහු ආජන්ටිනාවේ මෝටර් රථ කාර්මික ශිල්පියෙකි. ජෝර්ජ් ඕ’ඩොන් නම් 59 හැවිරිදි මේ පුද්ගලයාගේ නිර්මාණය කොතරම් වැදගත් වුවත් එය හිතා ගන්නට බැරි තරම් සරල උපකරණයකි. ඇත්තෙන්ම මෙම උපකරණය පොලිතින් බෑගයක් සහ එයට සම්බන්ධ ඉන්සර්ටර්
නම් උපකරණයකින් සමන්විතය. මේ කොටස් දෙකට අමතරව මෙහි කුඩා බටයක් (සේලයින් බටයක් වැනි) සහ එහි කෙළවරට සම්බන්ධ කළ රබර් බෝලයක් ද ඇතුළත් වෙන බව ජෝර්ජ් ඕ’වෝන් පවසයි.
මෙහි ප්‍රධාන අංශය වනුයේ පොලිතින් බෑගයයි. එය අඟල් 20ක් පමණ දිගින් යුතු වෙන අතර එහි යට කෙළවර අඟල් 6ක් පමණ ඇතුළට නවා තිබෙනු දැකගත හැක. මෙහි උඩ කොටස මුද්‍රා තබා සකසා ඇති අතර අප දකින සාමාන්‍ය බෑගයක මෙන් මෙම උඩ කොටස සිහින් හැඩලයක්ද නිර්මාණය කර තිබේ. මෙම උඩ කොටසින් බෑගය තුළට ඇතුළු කර ඇති ඉන්සර්ටරය දැකිය හැකියි. මෙම ඉන්සර්ටරයේ ඇතුළු කෙළවරට කුඩා රබර් පුනීලයක් වැනි යමක් සවිකර තිබෙනවා. ඊට අමතරව ඉන්සර්ටරය ඇතුළට යොදා ඇති විශේෂිත බටයක් ද දැකගත හැක. මෙම බටය කෙළවරට
සම්බන්ධ විශේෂිත අඬු 4ක් දැකගත හැක.
මෙම උපකරණය යොදා ගෙන දරු ප්‍රසූතිය සිදුකිරීමට වෙනත් විශේෂ උපකරණ කිසිවක් අවශ්‍ය නැති බව ඕඩොන් පවසයි. ඒ සඳහා මව සාමාන්‍ය ආකාරයෙන් සයනය කරවිය යුතු වන අතර ප්‍රසවය ඇරඹීම, ගැබ් ගෙල විවර වීම, ආදී ක්‍රියා සාමාන්‍ය ප්‍රසූතියකදී මෙන් වෛද්‍ය අධීක්ෂණයට ලක් විය යුතුයි.
මෙම උපකරණය මවගේ යෝනි මාර්ගය තුළින් ඇතුළු කිරීමට සුදුසු අවස්ථාව සරල ඥතමඪජ පරීක්ෂණයකින් පසු තීරණය කළ හැකි බව මෙම උපකරණය පිළිබඳ පර්යේෂණය
කරන ප්‍රසව හා නාරිවේද වෛද්‍යවරු පවසති. මෙය මවගේ ශරීරයට ඇතුළු කිරීමට පෙර පොලිතින් බෑගයේ මෙන්ම මවගේ යෝනි මාර්ගයේද සාමාන්‍ය ලිහිසි කාරකයක් ගැල්විය යුතු වෙයි. මේ සඳහා වට්ටෝරු රහිතව පවා මිලදී ගත හැකි වෙළෙඳ පොළේ සුලබ ජෙල් වර්ගයක් හොඳටම ප්‍රමාණවත් බව වෛද්‍යවරු පවසති.
මෙම උපකරණය සම්බන්ධව ඉන්සර්ටරය මගින් දරුවාගේ හිස ස්පර්ශ කර අනතුරුව ඉන්සර්ටරය ඇතුළත ඇති බටයට සම්බන්ධ අඬු හතර මගින් පොලිතින් බෑගයේ පහළ කෙළවර දරුවාගේ හිස සහ මුහුණ වටා යවා ගෙල ප්‍රදේශයට ගෙන ආ යුතුයි. (ඉන්සර්ටරය සම්බන්ධ අඬු ඉතා සැහැල්ලු ද්‍රව්‍යයකින් ඔතා ඇති බැවින් දරුවාගේ මුහුණට කිසිදු හානියක් තබා සීරීමක් වත් සිදු නොවේ.
පොලිතින් බෑගය ගෙල වටා රැඳවූ පසු ඉන්සර්ටරය ඉවත් කළ හැක. අනතුරුව ඉන්සර්ටරය ඉවතට ගත් ස්ථානය ඇඟිලිවලින් තද කිරීම මගින් මුද්‍රා තැබිය යුතුය. ඉක්බිතිව උපකරණය සම්බන්ධ කුඩා බටය කෙළවරේ ඇති බෝලය මිරිකමින් බෑගය තුළට සුළං ප්‍රමාණයක් ඇතුළු කළ යුතුයි. සුළං ඇතුළු වීම නිසා දරුවාගේ හිස සහ මුහුණ මතින් ගෙල දක්වා වැටුණ බෑගය හොඳින් තදවේ. අනතුරුව බෑගයේ උඩ කෙළවරට සම්බන්ධ හැඬලය මගින් ක්‍රමානුකූලව දරුවා පිටතට ඇදගැනීම සිදුකරයි.
මෙම උපකරණය පිළිබඳ අදහස් ඕඩොන්ගේ සිතට පැමිණ ඇත්තේ යූ ටියුබ් ඔස්සේ විකාශනය වූ වීඩියෝවක් දැකීමෙන් බව ඔහු පවසයි. එම වීඩියෝ පටයේ සුළං පිරවූ බෑගයක් මගින් වයින් බෝතලයක් තුළට වැටුන කිරළ මූඩියක් ඉවතට ගන්නා අයුරු දුටු ඕඩොන්ට මෙම මූලධර්මය යොදා කළ හැකි වෙනත් ක්‍රියාවක් ගැන සිතුවිලි පහළ වෙන්නට විය.
මුළු දවසක් මේ ගැන සිතූ ඕඩොන්ට එදින මධ්‍යම රාත්‍රියේ වයින් බෝතලයකින් කිරළ මූඩිය පිටතට ගන්නා ආකාරයට ගර්භාෂයෙන් දරුවෙකු පිටතට ගත හැකි බව වටහා ගත හැකි විය. මධ්‍යම රාත්‍රියේම තම බිරිඳ නින්දෙන් අවදිකොට ඔහු ඇයට තම අදහස පවසා තිබේ. ඉන් කුපිත වූ ඇය, අනෙක් පසට හැරී නිදා ගන්නා ලෙස ඔහුට පවසා යළි නින්දට ගිය බව ඕඩොන් පවසා තිබේ.
පසුදා ඔහු තම ගරාජයට ගොස් මෙම උපකරණයේ මූලික ආකෘතිය සාදා තම පවු‍ලේ ප්‍රසව වෛද්‍යවරයා වෙත ගොස් එය පෙන්වා තිබේ. ඕඩොන් හා පැවැති කෙටි සාකච්ඡාවකින් පසු මෙම උපකරණයේ සාර්ථක බව වටහාගත් මෙම වෛද්‍යවරයා මේ පිළිබඳ සෙසු වෛද්‍යවරුන් දැනුවත් කර ඇත. ඒ අනුව ඕඩොන්ට මෙම උපකරණය සම්බන්ධ පේටන්ට් අයිතිය ලබා ගන්නා ලෙස එම වෛද්‍යවරුන් පවසා ඇත.
මෙම උපකරණයට පේටන්ට් අයිතිය ලබාගත් ඕඩොන් ලෝක සෞඛ්‍ය සංවිධානයට මෙම උපකරණය ඉදිරිපත් කර තිබේ.
මෙම උපකරණය ලෝක සෞඛ්‍ය සංවිධානයේ අගැයීමට ලක්ව තිබෙන අතර අත්හදා බැලීමේ මට්ටමින් ලතින් ඇමෙරිකානු රටවල් කිහිපයක මෙන්ම දකුණු අප්‍රිකාවේ ග්‍රාමීය පෙදෙස්වලද මෙම උපකරණය භාවිත කරන බව වාර්තා වේ. ඕඩොන්ගේ අපූරු උපකරණය භාවිත කර මේ වන විට දරු උපත් සිය ගණනක් සිදුකර තිබෙන අතර ඒ සෑම මවක් සහ දරුවෙකුම ඉතා සුවෙන් සිටිනා බව වාර්තා වේ.
ඕඩොන්ගේ උපකරණය ස්වාභාවික දරු උපත් සිදු කරන මව්වරුන් අතර ඉදිරියේදී බොහෝ ජනප්‍රිය වනු ඇති බව වෛද්‍යවරුන් පවසයි. මෙම උපකරණය නිසා දරු ප්‍රසූතිය සඳහා වැය වන කාලය අඩු වන අතර, ස්වාභාවික උපතකදී මවගේ යෝනි මාර්ගය ආශ්‍රිතව ඇතිවන සංකූලතාවන් සහ තුවාල නිසා ඇතිවන අපහසුතාවන්ද මගහැරෙන බවද වෛද්‍යවරුන් වැඩිදුරටත් පවසයි. එමෙන්ම මෙම ක්‍රමය අඬු භාවිතා කර ප්‍රසූතිය සිදුකිරීමට මෙන්ම වැකුම් ක්‍රමයට දරුවන් බිහි කිරීමටද වඩා ආරක්ෂා සහිත බව එම වෛද්‍යවරු පවසති.
විශේෂයෙන්ම උපත් මාර්ගය ආශ්‍රිත ගැටලු නිසා දරු ප්‍රසූතිය අසීරු වන, එහෙත් සිසේරියන් සැත්කම් සඳහා මුදල් නොමැති දිළිඳු කාන්තාවන්ට මෙම ක්‍රමය ඉතා අස්වැසිල්ලක් බව වෛද්‍යවරු පවසති. වරක් භාවිතා කර ඉවත දැමිය හැකි මිල අඩු ලාබදායි උපකරණයක් වන මෙය, දිළිඳු රටවල මව්වරුන් අතර ඉහළ පිළිගැනීමකට ලක්වෙන බව පැහැදිලිව පැවැසිය හැකිය යැයි වෛද්‍යවරුන් ගණනාවක් පවසා තිබේ.
මෝටර් රථ කාර්මිකයෙකු ලෙස ඕඩොන් සතුව ඇති දැනුම මෙම උපකරණය නිෂ්පාදනයේදී භාවිත කර ඇති බව ඕඩොන්ගේ මිතුරන් පවසයි. මෙම උපකරණයේ ඉන්සර්ටරය
කෙළවරට සවිකර ඇති රබර් පුනීලය නිසා එය මෝටර් රථ කාර්මිකයන් කපාට සවිකිරීමේදී භාවිතා කරනා ‘වෑල්ව් මුල්’ එකකට සමාන බව පවසන ඔවුන් ප්‍රසූතිය සහ කාන්තා ශරීරය ගැන ඕඩොන් තුළ වූ නොනැසෙන කුතුහලය මෙම නිර්මාණයේ පදනම බව පවසයි.
අරුණ ලක්ෂ්මන් ප්‍රනාන්දු - Lakbima
